Abbosov Shuhrat Salixovich


1786

Tug‘ilgan sana: 1931 Yanvar 16
Tug‘ilgan joyi: Qo’qon
Yo‘nalishlar: Aktyorlar

Таниқли кинорежиссёр Шуҳрат Аббосов 1931 йилда Қўқонда туғилган. 1954 йилда Тошкент театр ва рассомлик санъати институтининг режиссёрлик факультетини, 1958 йилда «Мосфильм» киностудияси қошидаги Олий режиссёрлик курсини тугатган.

М.Уйғур номидаги Тошкент вилоят Янгийўл мусиқали драма театрида бош режиссёр сифатида ўз фаолиятини бошлаган. Ш.Аббосов Б.Раҳмоновнинг «Юрак сирлари», К.Яшиннинг «Нурхон», Ҳамзанинг «Майсаранинг иши», А.Қаҳҳорнинг «Оғриқ тишлар» ва бошқа спектаклларини саҳналаштирди.

Шуҳрат Аббосов 1959 йилдан «Ўзбекфильм» киностудиясида постановкачи режиссёр сифатида иш бошлаб, «Маҳаллада дув-дув гап» (1960), «Сен етим эмассан» (1962), «Қалбингда қуёш» (1966), «Тошкент-нон шаҳри» (1967), «Муҳаббат можароси» (1971), «Абу Райҳон Беруний» (икки қисмли тарихий-биографик фильм, 1974), «Оловли йиллар», «Отамдан қолган далалар» (икки қисмли бадиий фильм, 1998) ва бошқа фильмларни экранлаштирди.

«Абу Райҳон Беруний», «Муҳаббат можароси», «Қалбингда қуёш», «Отамдан қолган далалар» фильмларининг сценарийларини ёзишда ҳаммуаллиф бўлди. Санъаткор суратга олган фильмларнинг кўпчилиги ўзбек кино санъатининг олтин хазинасидан муносиб ўрин олди, миллий кино санъатимизни жаҳонга танитди. Бу фильмлар халқаро кинофестивалларда юксак баҳоланиб, катта мукофотларга сазовор бўлди.

«Абу Райҳон Беруний» фильми Осиё, Африка ва Лотин Америкаси мамлакатларининг IV Халқаро Тошкент кинофестивалида муваффақиятли равишда намойиш этилди ва 1976 йилда Теҳрон кинофестивалида «Олтин дельфин» соврини билан тақдирланган бўлса, VIII Бутуниттифоқ кинофестивалида (1975) бош мукофотга сазовор бўлди.

Шунингдек, «Сен етим эмассан» фильми 1963 йилда Франкфурт-Майнеда бўлган Халқаро кинофестивалда, «Тошкент - нон шаҳри» фильми эса 1968 йилда Олма-ота кинофестивалида яхши режиссёрлик иши ва тасвирий санъат кўринишлари учун фестиваль совринига сазовор бўлди.

«Муҳаббат можароси» фильми 1972 йил Тбилиси Бутуниттифоқ фестивалида яхши режиссёрлик иши номинациясига сазовор бўлди.

Шуҳрат Аббосов кўп йиллардан бери Маннон Уйғур номидаги Тошкент Давлат санъат институтида «Актёрлик маҳорати ва режиссура» кафедраси мудири, институтнинг бадиий раҳбари вазифасида ишлаб, ижодий иш билан педагоглик касбини моҳирлик билан олиб бориб, ёш истеъдодли санъаткорларни тарбиялаб вояга етказмоқда.

У Осиё, Африка ва Лотин Америкаси мамлакатларининг Халқаро Тошкент кинофестивалларининг Ташкилий қўмитасининг аъзоси бўлган. 1996 йилдан бери эса Кино арбоблари Бирлашмаси раиси ўринбосари вазифасида ишлаб келмоқда.

Сермазмун ва серқирра ижоди «Ўзбекистон халқ артисти» ва «Халқ артисти» унвонлари ва Давлат мукофоти билан тақдирланган.

1998 йилда Ўзбекистон Республикаси Президентининг Фармонига биноан Ш.Аббосов «Эл-юрт ҳурмати» ордени билан мукофотланди.

O‘zbekiston kinematografchilar Birlashmasi hukumati kotibi

Режиссёрлик ишлари

  • 1958 - Василий Лоханкин
  • 1960 -Маҳаллада дув-дув гап
  • 1962 -Сен етим эмассан
  • 1968 - Тошкент - ноншаҳри
  • 1974 - Абу Райҳон Беруний
  • 1977-1985 – Оловли йўллар (17-қисм)
  • 1990 – Жангдаги кичкина одам

Мукофотлари

  • Кишинёвдаги VIII Бутунжаҳон кинофестивалининг Бош мукофоти (1975)
  • Теҳрон Халқаро кинофестивалида «Олтин дельфин» мукофоти (1977)
  • Франкфурт Майнедаги Халқаро кинофестиваль мукофоти (1963)
  • Энг яхши режиссёр ва энг яхши тасвир маҳорати учун Олма-ота фестивали мукофоти (1968)
  • Тбилисидаги энг яхши режиссёри учун Бутуниттифоқ фестивали мукофоти (1972)
  • Ҳамза номидаги Ўзбекистон давлат мукофоти (1974)
  • Ўзбекистон Ленин комсомол мукофоти (1972)
  • Қизил Байроқ Меҳнати ордени
  • “Эл-юрт ҳурмати” ордени
  • Ўзбекистон Халқ артисти унвони
  • СССР Халқ артисти (1981)
Xato to‘g‘risida ma‘lum qilish Translit