Bagdasarov Armen


2234

Tug‘ilgan sana: 1972 Iyul 31
Tug‘ilgan joyi: Toshkent
Yo‘nalishlar: Sportchilar

1972 yilning 31 iyulida tug‘ilgan. To‘qqiz karra O'zbekiston chempioni. XXVI Atlanta Olimpiadasi kumush medali sohibi (1996), Osiyo chempioni. Butun jahon talabalar Universiadasining kumush medali sovrindori. "Mehnat Shuhrati" ordeni va "O'zbekiston Respublikasida xizmat ko‘rsatgan sportchi" faxriy unvoniga sazovor bo‘lgan.

Armen sport zaliga dastlab qadam qo‘yganida 12 yoshda edi. O‘sha kundan boshlab unga O‘zbekistonda xizmat ko‘rsatgan sport ustozi V.Pyatayev dzyudo sirlarini o‘rgatgan.

1992 yili Armen birinchi yirik g‘alabaga erishdi — Isroilda o‘tgan Yevropa chempionatida bronza medaliga sazovor bo‘ldi. 1995 yili Jahon chempionatida qatnashib, beshinchi o‘rinni egalladi.

1996 yili Vyetnamda bo‘lib o‘tgan Osiyo chempionatida u yanada salmoqli yutuqqa erishdi. Atlanta Olimpiadasida kumush medalga sazovor bo‘ldi. Bu yozgi Olimpiya o‘yinlarida mamlakatimiz vakillari qo‘lga kiritgan dastlabki yutuq sifatida ham qadrlidir.

1998 yili u Bangkokda o‘tkazilgan XIII Osiyo o‘yinlarida kumush, 1999 yili Osiyo chempionatida (Xitoy) oltin medallarini qo‘lga kiritdi. O'zbek kurashi bo‘yicha Birinchi Jahon chempionatida sharafli ikkinchi o‘rinni egalladi.

O‘zbekistonimiz shuhratini dunyoga yoyish borasida Armen Bagdasarov qilgan xizmatlar hukumatimiz tomonidan munosib taqdirlangan.

Armen Bagdasarov 2001 yildan dzyudo bo‘yicha O'zbekistan terma jamoasining bosh murabbiysidir.

Xato to‘g‘risida ma‘lum qilish Translit