Абдусатторов Нодирбек


1417

Туғилган сана: 2004 Сентябр 18
Тўғилган жойи: Тошкент
Йўналишлар: Спортчилар

Нодирбек Абдусатторов 2004 йилнинг 18 сентябрида Тошкент шаҳрида туғилган. Шахмат сирларини 3.5 ёшидан бошлаб ўргана бошлаган. Ёш бўлишига қарамай шаҳар, республика ва Халқаро миқёсдаги турнир ва мусобақалар ғолиби. Нодирбек 2012 йили ФИДЕ Мастери фахрли унвонига, 2017 йилда нуфузли мусобақаларда муносиб иштирок этиб, Халқаро Гроссмейстер фахрли унвонига сазовор бўлди.

Ёш шахматчи Нодирбек Абдусатторов 2011 йили икки йирик мусобақа – Ҳиндистонда мактаб ўқувчиларининг Осиё чемпионатида олтин ва Филиппинда ўсмирлар ўртасидаги қитъа биринчилигида бронза медални қўлга киритган. 2012 йил Словениянинг Марибор шаҳрида ўтказилган жаҳон чемпионатида олтин медалга сазовор бўлган, Ҳиндистоннинг Деҳли шаҳрида мактаб ўқувчилари ўртасидаги VIII Осиё чемпионатининг рапид – тезкор шахмат баҳсларида кумуш медаль билан тақдирланган.

2014 йили пойтахтда ўтказилган шахмат бўйича Осиё чемпионатида Нодирбек Абдусатторов ўн ёшгача бўлган шахматчилар баҳсида шоҳсупанинг энг юқори поғонасига кўтарилган, блиц турнирда эса кумуш медални қўлга киритган. Жанубий Африка Республикасининг Дурбан шаҳрида бўлиб ўтган шахмат бўйича 8-18 ёшли ўғил-қизлар ўртасидаги жаҳон чемпионатида иккинчи ўринни эгаллаган.

2016 йили Россиянинг Сочи шаҳри мезбонлик қилган мактаб ўқувчилари ўртасидаги жаҳон чемпионатида иккита олтин медалга сазовор бўлган. 2016-2017 йилларда Россия ва Бирлашган Араб Амирликларида ўтказилган нуфузли мусобақаларда муносиб иштирок этиб, халқаро гроссмейстер талабини бажарган.

Жаҳон аренасида эришган натижалари:

2012 йил 8 ёшгача бўлган ўғил болалар ўртасида жаҳон чемпиони (Марибор, Словения), ФИДЕ Мастери;

2014 йил 10 ёшгача ўғил боллар ўртасидаги жаҳон чемпионатида иккинчи ўрин (Дурбан, ЖАР);

2015 йил 12 ёшгача бўлган ўғил болалар ўртасида жаҳон чемпиони (Порто Каррас, Греция);

2016 йил сентябрда халқаро Мастер талабларини бажарди (Куала-Лумпур, Малайзия);

2016 йил октябрда М.Чигорина хотирасига бағишланган халқаро турнирда гроссмейстр унвонининг 1- талабини бажарди (Санкт-Петербург, Россия);

2016 йил 13 ёшгача бўлган мактаб ўқувчилари ўртасидаги жаҳон чемпиони (Сочи, Россия,)

2017 йил августда нуфузли халқаро мусобақада гроссмейстр унвонини 2- талабини бажарди (БАА, Абу-Даби);

2017 йил 29 октябрда бўлиб ўтган нуфузли халқаро мусобақада муносиб иштирок этиб халқаро гроссмейстер унвонининг барча талабларини бажарди (Санкт-Петербург, Россия).

Хато тўғрисида маълум қилиш Транслит