Маваева Гулнора


2482

Туғилган сана: 1931 Июл 31
Тўғилган жойи: Тошкент
Йўналишлар: Раққослар

Раққоса ва балерина, Ўзбекистон халқ артисти Гулнора Маваева 1931 йилда туғилган. 1941 йилда Тамарахоним номидаги балет мактабини, 1951 йилда Москвадаги катта театр қошидаги хореография билим юртини, 1971 йилда Санкт-Петербургдаги хореография билим юртининг педагоглар курсини тугатган бўлса, 1945-1949 ва 1951-1957 йилларда Алишер Навоий номидаги Опера ва балет театрида солистка бўлиб ишлади.

Таржимаи ҳол

Гулнора Маваева опера театрида ишлар экан, устоз санъаткор Мукаррама Турғунбоевадан ўзбек рақс санъатининг нозик сирларини ўрганди, Уста Олим Комилов, Тамарахонимларнинг қимматли маслаҳатларига қулоқ солди, Ҳалима Носирова ва Саодат Қобуловалардан сўз санъатининг сеҳрини ўрганди. «Улар билан сафарда бўлиш ғоят қизиқарли эди, — деб ҳикоя қилади Гулнора Маваева. Менга ўзбек қўшиқларидаги ҳар бир сўзнинг асл маъносини эринмасдан тушунтириб берардилар. Бу эса сўзга мос ҳаракат топишимга ёрдам берарди. Улардан мен ўзбек санъатини чинакам севишни ўргандим».
Раққоса опера театри саҳнасида Оврўпо, рус ва ўзбек балетларида асосий партияларни моҳирона ижро этди. Жаҳоннинг мумтоз дурдоналари «Жизель», «Оққуш кўли», «Уйқудаги гўзал», «Эсмеральда» каби асарларидаги, шунингдек, «Боқчасарой фаввораси», «Бахт қирғоғи», «Момақалдироқ изидан», «Маскарад» каби спектакллардаги, «Оқбилак», «Гуландом», «Ойниса», «Кашмир афсонаси» каби балетлардаги бош партиялар санъаткорни элга танитди ва шуҳрат келтирди. Унинг бу партияларни ихлос билан ижро этишини кўрган бастакор Георгий Мушель ўзининг «Балерина» асарини унга атаб ёзган эди.
Гулнора Маваева ўзбек миллий рақсларини нозик ва ёқимли тарзда ижро этган истеъдодли раққоса сифатида «Катта ўйин», «Пилла», «Фарғона усули», «Шўх қиз», «Завқим келур», «Уйнасин», «Эй сарви равон», «Оразбон лазгиси» ва бошқа рақсларни залга манзур қилиб ижро эта билди. Раққоса Давид Ойстрах, Георг Отс, Дмитрий Башкиров, Людмила Лядова, Арам Хачатурян, Рашид Бейбутов каби машҳур санъаткорлар билан кўпгина хорижий мамлакатларда ижодий сафарларда бўлиб, ўзбек рақс санъатининг нодир дурдоналарини кўз-кўз қилди. 1953 йилда Бухарестда бўлиб ўтган ёшлар ва талабалар Жаҳон фестивалининг биринчи мукофоти ва «Олтин медал»ига сазовор бўлди.
Гулнора Маваева 1971 йилдан педагоглик соҳасига ўтиб, аввал Тошкент хореография билим юртида, 1974 йилдан Тошкент Маданият институтида, Тошкент хореография институтида Оврўпо мумтоз рақсларидан сабоқ бериб, Маъмура Эргашевага ўхшаш истеъдодли раққосаларни тарбиялаб вояга етказди.

Хато тўғрисида маълум қилиш Транслит