Қосимжонов Рустам Машрукович


3772

Туғилган сана: 1979 Декабр 5
Тўғилган жойи: Тошкент
Йўналишлар: Спортчилар

1979 йилнинг 5 декабрида Тошкентда туғилган. Шоҳмот бўйича Осиё чемпиони, жаҳон чемпионати минтақавий мусобакаси ғолиби, Бутун-жаҳон шоҳмот олимпиадасида шахсий ҳисобда бронза медалига сазовор бўлган. Халқаро гроссмейстер. "Узбекистан ифтихори" фахрий унвони ҳамда "Узбекистан белгиси" кўкрак нишони билан тақдирланган.

Рустам Қосимжонов болалигидан шоҳмотга алоҳида меҳр қўйган, дастлаб мураббий Александр Грушевскийдан, кейинчалик тажрибали мураббий Сергей Пинчукдан сабоқ олган. 1990 йили Узбекистан биринчилигида ғолиб чиққач, эл назарига тушган. 1994 йил унинг ҳаётида ёрқин из қолдирди. Ёш шоҳмотчи Катар пойтахти Дохада Осиё чемпиони бўлди. Венгриянинг Сегед шаҳрида жаҳон биринчилигида иштирок этди ва бронза медалини қўлга киритди. Президентимиз Ислом Каримов ёш шоҳмотчига компьютер ва 300 мингдан зиёд сара ўйинлар матни ёзилган кассета совға қилди. Бу унинг камолот йўлидан дадил одимлашига замин яратди, 1995 йили Бразилиянинг Гуарпуова шаҳрида бўлган жаҳон биринчилигида Рустам яна бронза медалига сазовор бўлди. 1996 йили Осиё шаҳарлари чемпионатида бош совринни олган жамоамиз таркибида ўйнади. 1997 йили Узбекистан чемпионатида зафар қучди ва халқаро гроссмейстер талабини бажарди.

1998 йили Теҳронда I Осиё чемпионатида ғолиблик шоҳсупасига кўтарилди. Ўша йили Остона (Қозоғистон) шаҳрида жаҳон чемпионатининг минтақавий мусобақасида биринчи ўринни эгаллади.

2000 йил Рустам учун омадли келди. Аввал Узбекистан чемпионатида, кейин Наманганда жаҳон чемпионатининг минтақавий мусобақасида ғалаба қозонди. Германиянинг "Золинген" клуби таркибида жаҳоннинг етакчи гроссмейстерларига қарши муваффақиятли дона сурди.

Бу унинг шахсий кўрсаткичларини яхшилади. У 2692 кўрсаткич бирлик билан ФИДЕнинг 2000 йил 1 июлдаги таснифида 13-ўринга кўтарилди.

2001 йил ҳам ҳамюртимиз учун муваффақиятли бошланди. Май ойида Рустам Қосимжонов Германияда ўтган нуфузли халқаро турнирда дунёнинг бир қатор таниқли гроссмейстерларини ортда қолдириб, ғолиб чикди.

Иқтидорли ёш гроссмейстер Рустам Қосимжоновнинг эзгу нияти - жаҳон шоҳмот тожини юртимизга олиб келишдир.

Хато тўғрисида маълум қилиш Транслит