Қуттибоев Еркинбой


3337

Туғилган сана: 1972 Август 28
Тўғилган жойи: Нукус
Йўналишлар: Спортчилар

1972 йилнинг 28 августида Нукус шаҳрида туғилган. Кикбоксинг бўйича Европа чемпиони, муайтай бўйича уч карра жаҳон чемпиони, Осиё ўйинлари ғолиби. "Ўзбекистон ифтихори" фахрий унвони билан такдирланган. Еркинбой эркин кураш тўгарагига қатнай бошлаганида ўн икки ёшда эди.

У ўсмирлар ўртасида республика миқёсида ўтказилган мусобақаларда ўз иқтидорини намойиш этган.

Киев муҳандислик-қурилиш институтида таълим олиш билан бирга мунтазам бокс билан шуғулланди, кейинчалик спортнинг кикбоксинг турига меҳри ортди.

1994 йили Италиянинг Римини шаҳрида бўлиб ўтган мусобақада Европа қитъасидаги энг кучли кикбоксингчи эканлиги расман эътироф этилди.

Еркинбой яккакурашнинг таиландча муайтай турини ҳам мукаммал ўзлаштирган. 1995 йили Таиланд пойтахти Бангкокда бўлиб ўтган жаҳон чемпионатида муайтай бўйича номдор спортчиларни енгиб 91 килограмм вазнда зафар қучди, Кейинги йили ҳам шу шаҳарда таиландликларни лол қолдириб, "Қирол кубоги"ни қўлга киритди.

1997 йили иккинчи бор жаҳон чемпионатида ғалаба қозонди. 1998 йилда таиландликлар икки бор Еркинбойни олқишлашди: у жаҳон чемпиони бўлди, ХIII Осиё ўйинларида шоҳсупанинг энг юқори поғонасига кўтарилди.

1999 йили Еркинбой бокс бўйича Узбекистан чемпионатида иштирок этиб, 91 килограммдан юқори вазнда кумуш медал билан такдирланди.

Еркинбой Қутибоев 2000 йили Бангкокда муайтай бўйича жаҳон чемпионатида бронза медалини қўлга киритди. 2001 йили муайтай бўйича олтинчи маротаба Узбекистан чемпиони бўлди.

Хато тўғрисида маълум қилиш Транслит